आग्रह

आश्रय रवि

 काडाँघारीको
जंगली मान्छेलाई
फूल नपठाईदिनु
महोदय
जब कि मलाई
फूलभन्दा काडाँनै
प्रिय लाग्छ
म चाहन्छु फूलको
अपमान नहोस्
अध्यारै-अध्यारो
आदिम वस्तीमा
जून तारा नपठाईदिनु
महोदय
अन्धकार नै प्रिय छ
युगौ-युगदेखि
वर्तमानसम्म
फेरि जाग्न सक्छ
उज्यालोको चेतनाहरु
म चाहन्छु हजुरको
नटुक्रियोस् गिदी
नगुमोस् ज्योति
विकृतिले बाँझो भएको
दुषित माटोमा छर्नलाई
संस्कृतिको बिउ नपठाईदिनु
महोदय
दुषित माटोको
विकृत संस्कृती नै
किन किन प्रिय लाग्छ
रगत र पसिना लत्पतिएका
खोरिया जंगलमा
अपमानित सभ्यताको
जग हाल्न नखोज्नु
महोदय
अझै जिउँदै छन
खाम्जिरी खाम्बोङ्बा